ನಾಗರ ಪಂಚಮಿ : ತುಳುನಾಡ್.

    ನಮ್ಮ ತುಳುನಾಡ್ ಅವೇತೋ ದೈವದೇವೆರ್ ನೆಲೆಯಾಯಿ ಪುಣ್ಯಮಣ್ಣ್ ಆಂಡಲಾ ನಮ್ಮ ಈ ಪುಣ್ಯನೆಲಟ್ ನಾಗರಾಧನೆಗ್ ಬಾರೀ ಮಹತ್ವ ಉಂಡು.
   ಈ ಪವಿತ್ರ ಭೂಮಿದ ಆರಾಧ್ಯ ದೇವೆರ್ ನಾಗದೇವೆರ್, ಒಂಜಿ ಕಾಲಡ್ ಈ ತುಳುನಾಡ್ ಕಡಲ್ದ ಉಲಯಿ ನಾಗಲೋಕ ಆದಿತ್ತುದ್, ಪರಶು ರಾಮ ದೇವೆರೆ ಕುಡರಿ ಬೂರ್ದ್ ಕಡಲ್ ಪಿರ ಜಾರ್ದ್ ಈ ತುಳುನಾಡ್ಡ ನೆಲ ಸ್ರಷ್ಠಿ ಆಂದ್ ಪನ್ಪಿ ನಂಬೊಳಿಗೆಲಾ ಉಂಡು. ಒಂಜಿಕಾಲದ್ ಈ ಮಣ್ಣ್ ನಾಗಲೋಕ ಆಯಿನೆರ್ದವರ ಇನಿಕ್ಲಾ ನಾಗ ದೇವೆರೆನ ಪೂಜೆಗ್ ಬಾರೀ ಉಚ್ಚಯದ ಸ್ಥಾನಮಾನ ಉಂಡು.
    ಈ ನೆಲಟ್ ಆವೇತೊ ಮುಖ್ಯ ನಾಗಕ್ಷೇತ್ರಲ್ ಉಂಡು. ಕುಡುಪು, ಸುಬ್ರಮಣ್ಯ, ತೊಕೂರು, ವರ್ಕಾಡಿ ದಂಚಿನ ಪುಣ್ಯಕ್ಷೇತ್ರಲ್ ಉಂಡ್, ಆತೇ ಅತ್ತಂದೆ ಪ್ರತೀ ದೇವಸ್ಥಾನಡ್ಲಾ ವಿಶೇಷವಾಯಿ ನಾಗಸಾನಿಧ್ಯ ಉಂಡು. ನಾಗರ ಪಂಚೆಮಿ ಮಾತ್ರ ಅತ್ತಂದೆ ಚಂಪಾ ಷಷ್ಠಿ, ಪಂಚೆಮಿ, ತಿಂಗೊಲ್ದ ಸೇವೆಲ್, ಪ್ರತೀ ನಿತ್ಯ ತಂಬಿಲ, ಆಶ್ಲೇಷ ಬಲಿಪೂಜೆ ಇಂಚ ನಾಗ ದೇವೆರ್ ತುಳುನಾಡ್ದ ಭಕ್ತ ಜನಕ್ಲೆರ್ದ್ ನಿತ್ಯ ಪೂಜೆ ಪಡೆಯೊಂನ್ನ ಪ್ರತ್ಯಕ್ಷ ದೇವೆರ್.
    ಈ ಪರಮ ಪವಿತ್ರ ನೆಲಟ್ ನಾಗರಪಂಚೆಮಿ ಪಂಡ ಬಾರಿ ಮಲ್ಲ ಪರ್ಬ, ಪ್ರತೀ ಇಲ್ಲರ್ದಲಾ ಜನಕುಲ್ ಗ್ರಾಮದ, ಜಾಗೆದ,ಮುಖ್ಯವಾದ್ ಕುಟುಂಬದ ನಾಗದೇವೆರೆಗ್ ತನು ಮೈಪುನವು ಬಾರೀ ವಿಶೇಷ. ನಾಗದೇವೆರೆಗ್ ತನು ತಂಬಿಲ ಸೇವೆ, ಪಂಚಾಮ್ರತ ಸೇವೆ, ಆಶ್ಲೇಷ ಪೂಜೆ ಇಂಚ ವಿಶೆಷವಾದ್ ಪೂಜೆಪಡೆರ್ ನಮ್ಮ ನಾಗದೇವೆರ್.
    ಆತೆ ಆತ್ತ್ ನಾಗರ ಪಂಚೆಮಿ ಪಂಡ ನಮ್ಮ ತುಳುನಾಡೊರ್ಮೆ  ಮಂಜಲ್ದಿರೆತ ಗಟ್ಟಿದ ಕಮ್ಮೆನ, ಬೆಲ್ಲ ತಾರಾಯಿಪಾರ್ದ್ ಮಂಜಲ್ದ ಇರೆಟ್ ಪೊದ್ದಿದ್ ಮಲ್ಪುನ ಗಟ್ಟಿ ಪಂಚೆಮಿ ಪರ್ಬದ ಬಾರೀ ವಿಶೇಷ. ಕುಟುಂಬದ ಮಾತೆರ್ಲ ಓರ ಕೂದ್ದ್ ತೆಲ್ತ್ ಪೂಜೆಮಲ್ಪುನ ಪವಿತ್ರದಿನ ನಾಗರ ಪಂಚೆಮಿ.
    ನಾಗ ದೇವೆರ್ ಮಾತೆರೆನ್ಲ ಎಡ್ಡೆ ಮಲ್ಪಡ್. ಸರ್ವೆರೆಗ್ಲಾ ನಾಗರ ಪಂಚೆಮಿದ ಎಡ್ಡೆಪ್ಪು.


ವಿಜೇಶ್ ದೇವಾಡಿಗ ಮಂಗಳಾದೇವಿ